რადიო თავისუფლების წყაროს ცნობით, 6 საკითხი, რომელიც ოპოზიციისა და პრემიერ-მინისტრ ღარიბაშვილის შეხვედრაზე, ევროპული საბჭოს პრეზიდენტის შარლ მიშელის ინიციატივით განიხილეს, და რომელზეც გაგრძელდება მოლაპარაკებები, მოიცავს შემდეგ პუნქტებს:
1) ამბიციური საარჩევნო რეფორმა;
2) კანონის უზენაესობა და სასამართლო რეფორმა, კერძოდ, უზენაეს სასამართლოს მოსამართლეთა დანიშვები, იუსტიციის უმაღლესი საბჭოში არჩევნების საკითხები და კორუფციასთან ბრძოლის გაძლიერება;
3) პოლიტიკური მართლმსაჯულება, კერძოდ, პატიმრების საკითხის გადაჭრა;
4) პარლამენტში ძალთა გადანაწილება, რაც მოიცავს საგამოძიებო კომისასა და პასუხისმგებლობებისა და როლების სამართლიან გადანაწილებას პარლამენტში;
5)პოტენციური ადრეული არჩევნები და მზადება ადგილობრივი არჩევნებისთვის;
6) ფასილიტაცია მედიაციის გაგრძელება და მიღწეული პროგრესის გადამოწმება, 15 მარტს, ევროკავშრი-საქართველოს ასოციაციის საბჭოს შეხვედრაზე.
შარლ მიშელმა ორბელიანების სასახლეში გამართული შეხვედრის შემდეგ თქვა, რომ საქართველოში განახლდა პოლიტიკური დიალოგი.
„გვქონდა ძალიან მნიშვნელოვანი შეხვედრა ოპოზიციური პოლიტიკური პარტიების ლიდერებთან და პრემიერ-მინისტრთან. გვქონდა ერთმანეთის მოსმენის შესაძლებლობა და გვესმის, რომ ბევრი რთული თემაა, რომლებსაც პოლიტიკური აქტორები უნდა გაუმკლავდნენ. მე მათ შევთავაზე ევროკავშირის მხარდაჭერა სხვადასხვა საკითხზე პოზიტიური მცდელობების განსამტკიცებლად. ორ კვირაში ბრიუსელში გვექნება საქართველოსთან ასოცირების საბჭოს სხდომა. ამ შეხვედრაზე განვიხილავთ რა პროგრესი იქნება მიღწეული სხვადასხვა რთულ თემასა და შეუთანხმებელ საკითხებზე", - განაცხადა მიშელმა.
შარლ მიშელი პრემიერ ღარიბაშვილთან ერთად გამართულ პრესკონფერენციაზე გამოვიდა ინიციატივით ოპოზიციასა და პრემიერს შორის 1 მაარტს, საღამოს შეხვედრის გამართვის შესახებ. პრემიერმა ღარიბაშვილმა იქვე დაადასტურა ოპოზიციასთან შეხვედრის მზადყოფნა.
ევროპული საბჭოს პრეზიდენტი საქართველოს 28 თებერვალს, საღამოს ეწვია. შარლ მიშელის ვიზიტი მიმდინარეობს საქართველოში ბოლო საპარლამენტო არჩევნების შემდეგ შექმნილი პოლიტიკური კრიზისის ფონზე, რომელიც კიდევ უფრო გაამწვავა „ნაციონალური მოძრაობის“ თავმჯდომარის, ნიკა მელიას დაპატიმრებამ.
მიშელი ვიზიტის ფარგლებში შეხვდა პრეზიდენტს, პრემიერ-მინისტრს, ოპოზიციის წარმომადგენლებს და პარლამენტის თავმჯდომარეს. ის ასევე ჩავიდა საოკუპაციო ხაზთან.
დაწერეთ კომენტარი